Ajax-loader-64

游记加载中...

英国二十日游

@瘦田无人耕耕开有

英国二十日游

1
第1天
2013-10-14 周一

2013年10月13日二十三点坐法航波音777飞巴黎戴高乐机场 航程9600几公里,耗时十二个半钟。机上冷气好劲,个个都想加毡,冇得加!受罪!
一早五点半到咗巴黎,发觉好鬼死冻(原以为候机楼有暧气),只好係免税店买咗件鰐魚厚衫,人民币约千五蚊,唔知贵定平,顶住档先。仲买咗一捆古巴雪茄,约500蚊。仲有一样唔明,转机去纽卡素(冇出机场)都要再过一次安检,好烦!多余!
等咗六个钟倒,十点十五分飞纽卡,係CITIJET航空,细机、坐滿人。听个仔讲平时都冇乜人。飞咗个半钟,到了。个仔係机场出口接机,老婆同个仔亲热下,之后坐地铁番住处,哗,落中雨。
到下午五点几去Tesco买D食嘢同日用品,又落中雨,贵人出门姐,唔使咁大阵仗瓜,淋餐死,好在着住冲锋衣。超市买咗九十镑D嘢,跟住番归煑嘢食啦。

泰恩河畔纽卡斯尔 英国
巴黎机场
第2天
2013-10-15 周二

今日瞓到好晏,十一点几出门,逛下街,午餐係唐人街嘅"名人御膳"食嘢,一个羊腩煲、半隻烧鸭、一碟菜心,共35镑,几好!晚餐番住处自己整盐焗鸡,哈哈,隻鸡琴日係超市买嘅,5镑。老婆整得仲几好食!

纽卡素
第3天
2013-10-16 周三

今日又係瞓到自然醒,讲明係休闲嘛!係住所自己煮饭食完先去纽卡斯尔大学同诺桑比亚大学参观。晚餐係唐人街"好面膳"一个咖喱猪扒饭、一个醤爆羊肉饭、一个羊肉炒粉一共25镑。饭后落大雨,只好打的番归。哗,2公里唔够,承惠5镑。老婆肉都痛埋添。
今晚执嘢,准备听日去爱丁堡玩,住两晚。

纽卡素
第4天
2013-10-17 周四

早上十一点出门,搭十一点五十二分嘅火车(每位来回票30几镑)去爱丁堡,到咗车站一睇架车要误点到十二点零五分先到站,最后係十二点十分。一点三十九分到咗爱丁堡,落雨粉。跟住打的去个仔係网上订嘅酒店"staycity",一晚90镑,可以三、四个人住。唔错,几正。放低行李就去逛街食嘢。
哗,一路行D雨越落越大,冲锋衣大派用场。买咗D苏格兰羊绒后,顶唔顺啊D雨,即刻喱埋间"GARFUNKEL'S RESTAURANT"西餐厅叹番下先。味道几正中,每位21镑。食完饭外面好似停雨,不过都天黑啦,游唔到景点啦,听日再玩。

第5天
2013-10-18 周五

今日去咗古城堡(每位16镑)同圣十字宫(每位11镑),白天冇落雨,中午食咗西餐,一般。晚餐係"大四喜"食,一隻当地龙虾、一份炆鸡、一碟菜心,共52镑,龙虾可以,虾虾虾!

爱丁堡城堡
Edinburgh Castle
第6天
2013-10-19 周六

今日返纽卡斯尔,下午四点半嘅火车。十一点几退房,行李想寄存,要收3镑,哎,俾啦。出街,又落雨,行到Mary King's close想睇表演,四点前都冇晒票,下次再嚟啦。又行去大象餐厅,人好多,冇食嘢。后尾去咗"鸿福麺中餐厅",一个羊腩煲、一个茶树菇辣肉、一个茄子,盛惠48镑。食饱饱就登CALTON HlLL,雨停咗,哗,成个EDINGBOURG尽收眼底,再登塔仔嘅话,要俾4镑/人,但景仲加靓,值唔值4镑就见仁见智啦。好,够钟搭火车。六点就返到咗纽卡。

第7天
2013-10-20 周日

今日喺纽卡休整,逛逛街,买D嘢,准备听日去加迪卡同伦敦。

第8天
2013-10-21 周一

今日坐十点七个字嘅火车去卡迪夫,60镑/人,要转四次车(先到伯明翰转第一次),先至到卡迪夫Future lnn Cardiff Bay酒店。顺带一句,成个英国室内都唔俾食烟,包括屋企里面,因为装咗烟感系统。
哎,下午四点半终于到埠,入住。双人房加一人,哗,两张双人床,两晚180镑。跟住去海边行下,跟住开饭:中餐四个菜色,49镑盛惠。

第9天
2013-10-22 周二

卡迪夫一日游。早上十点,一位喺卡迪夫住咗近二十年嘅老朋友来lnn接我哋去市中心玩。先喺行咗商场,买咗件衫同对鞋,行到攰就食嘢,食中餐,食完我话要埋单,朋友话唔得,要佢嚟埋,佢係地主。真係唔好意思!之后,带我哋去卡迪夫城堡,佢话仲要接仔放学,陪唔到我哋。就此话别,后会有期。
参观城堡每位11镑,同爱丁堡比,呢个城堡规模细好多好多,无所谓,致在休闲游,好舒服,冇咁多人。睇完城堡出来,落大雨,D雨洒咗十分钟。费事行路,打的返lnn,5镑几,呢段路广州打的应该唔使十蚊。
晚餐喺lnn附近嘅购物中心嘅"金满庭"中餐厅食自助餐,酒水要另外点,三人43镑。可以~~~~

第10天
2013-10-23 周三

今日十一点Chech out,转一次火车去Cardiff Central,坐十一点十一个字嘅火车去伦敦。下午二点零六分到伦敦Paddington站,转机场快线去希思罗机场,快线20镑/人,15分钟到。另一种8镑半,30分钟到。哗,超级贵。再喺机场打的去StayCity,17镑。三点十五分到咗Hayes & Harlington嘅SC。住四晚共422镑,一房一厅、三至四人间,睇落好过爱丁堡嘅SC。
个仔发现原来H&H可以坐火车去Paddington站,唔使坐机场快线加打的。蠢啊!
求其食D嘢,即刻坐火车去Paddington站,8镑半。买咗Oyster卡,再转地铁喺Waterloo站落,睇伦敦眼。天有眼,有晚霞啊,落咗几日雨,今日居然有晚霞!
回程时睇到Pad站中央嘅单车棚,感觉好人性化!

第11天
2013-10-24 周四

英国酒店或公寓唔提供拖鞋同牙刷,记住自己带。
十二点出门,伦敦连续两日阳光灿烂,先去西敏寺,门票每位20镑,个仔有英国青年卡便宜7镑。西敏寺里面唔俾影相。出嚟影下大笨钟。之后去国家美术馆,免门票,里面好大好多画。仲有睇咗特拉法加广场。又去睇咗福尔摩斯故居,每位8镑。
好,食晚饭时间,去咗贝克街附近嘅凤凰阁大酒家,装修好靓,点咗半隻手撕鸡、一个洋葱羊肉、一个豆苗,食咗66镑,偏贵,不过喺伦敦市中心,係咁㗎啦。食装修!

第12天
2013-10-25 周五

今日去比斯特扫货。坐大巴每位25镑来回(另外送张9折卡)。血拼到晚黑九点先返到住处。
个仔事先喺网上订票,再坐地铁去某酒店坐大巴(市内有3个地点上车)。十一点三个字出发,十八点开车返嚟。
晚黑返个阵,喺Pad火车站见到一个乐队演奏。

第13天
2013-10-26 周六

今日朋友带我哋去温莎堡玩,离伦敦30几公里。去到温莎堡门口啱啱有仪仗队出操,好彩!人多冇入堡参观,朋友话规模冇爱丁堡大。之后行去伊顿公学睇下,哗!成个小镇靓到飞起,超中意,超休闲。据说这在英国算富裕小镇。好,逛完就开车返伦敦唐人街食晏,喺"大跃进"食咗60几镑,一般,据讲呢间餐馆喺六四D人嚟伦敦开嘅。
饭后行咗下唐人街、HARRODS同BURBERRY,返归。晚餐喺SC(Staycity)自己整。
决定喺伦敦多住一晚,80几镑,SC可能有优惠。

第14天
2013-10-27 周日

今日第一站,大英博物馆,我嘅重点喺中国馆,一边睇一边谂,呢D文物喺点样流出中国嘅?其他馆就随便睇睇。跟住喺博物馆附近嘅"杨公馆"中餐厅食午饭,食咗49镑,一个口水鸡、一个梅菜扣肉、一个红烧茄子。之后去伦敦塔桥睇下,顺便约咗朋友个女出嚟见个脸,佢喺伦敦读研,哗,当日晏昼好鬼死大风、又冻,喺桥上吹到我哋头都赤晒,好似特工联系咁。
话别后,我哋又去咗牛津街,想去海德公园,天色已暗,算啦。下次再算。
之后赶去希思罗机场想办退税,去到先知比人玩,办事人员话:比斯特买D嘢,唔係一定要喺伦敦机场退税,喺纽卡素机场都得。顶你个肺,玩我哋,搞到我哋咁鬼远搭地铁嚟机场,白行一次。

第15天
2013-10-28 周一

今日十一点退房,返纽卡斯尔。火车票一百六十,三个人。车程约三个钟。10月27日二点已经唔用夏令时,依家时差八个钟。
不幸言中,受恶劣天气(26年以嚟最大暴风)影响,国王十字车站全部列车停开。唔想返去Staycity住,太远。就喺离车站十来分钟嘅地方租酒店,135镑一晚(包早餐),等听日嘅火车。今日车票可以保留到听日。
局住去咗白金汉宫睇下,外围。
中午同晚黑都喺酒店附近嘅"老成都"食,中午40镑,晚48.7镑。
相片中嘅大红纸花係车站喺11月11号准备纪念一战阵亡嘅士兵。

第16天
2013-10-29 周二

一早起身食早餐,去到餐厅一睇,唔喺自助,要点餐,我哋D英文麻麻哋,听唔明。局住返房叫个仔嚟做翻译兼食早餐,佢原本唔想食。
跟住去车站,稳到哈利波特嘅九右四分三站台,哗,好多人排队等影相。十一点半上火车,因为琴日火车停开,搞到今日人好多,冇位坐,好似春运咁。
三点钟到咗纽卡素,得个竖,好鬼死攰啊!
英国依家五点钟天黑。

第17天
2013-10-30 周三

今日自然醒,中午又喺"名人御膳"食龙虾仔,53镑。之后买下嘢,就返住处执行李,准备听日返归。
依家我终于明白,点解有报道话中国人喺欧洲应退未退嘅税款为50亿,占应退税款嘅一半。原来,你买嘢果阵最好係刷卡嘅人名同护照一致,如果唔係就退唔到税。另外,如果係两个人以上喺同一个地方买咗嘢,最好叫商家分开计退税,一齐合计嘅话,到海关办退税亦係非常麻烦。仲有,一旦你买咗要退税嘅商品,三个月内出境退税先会有效。记住,买要退税嘅商品时一定随身带住护照,因为商家要核对。

第18天
2013-10-31 周四

琴日个仔话喉咙有D唔舒服,我谂可能係呢几日陪我哋玩、辛苦,想感冒。不过,呢几日真係辛苦佢啦!
11点钟琴晚call咗嘅的士准时到门口,15分钟到机场,13.4镑。2个行李箱一个18kg、一个22kg,冇超重,幸运星高照。13点登机,13:30起飞。737-700机型。飞咗一个钟,14:30到阿姆斯特丹,即当地时间15:30。
到17:10登机,又要安检,17:50起飞,747-400机型,大概飞十个半钟。
11:35降落香港机场。
跟住过关坐机场大巴,后悔!原来机场大巴先喺机场用面包车接人过皇岗,再喺深圳等坐满人再开车,好似野鸡车,管理好混乱!足知等到14:40先开车。下次都唔会再坐!
16:50大巴到中国大酒店,呢个时间D的士交接班,等咗十几分钟先打到的,17:25到屋企。
其实,返到香港已经喺11月1号。计头计尾(10月13号到11月1号),啱好英国二十日游。
搞掂,收工。

小技巧

推荐使用鼠标滚轮来滚动浏览,效果最佳
也可用空格键,上下左右键,PgUp/PgDn滚动浏览

评论